( الـــشــــوگ سَلـنـي )

( الـــشــــوگ سَلـنـي ) ***** تدري بيّه الشوگ سَلـني و چذب اكابرْ. و تدري ليك العَين مُشتاگه و تـِناطرْ. واعدتني.. و گـتلـي باچر ْ.. آ .. يَـباچرْ. حضّرِت للشبگه روحي.. و رَدّدت لك..( لا تسافرْ..)*. (لاتسافر ياحبيبي لاتسافر) و السنين تفوت فوتات الخَـناجرْ.!!. بيش اصدّهَـه لا گلب جاسي و يردهَه ظَـلمه و الدلاّل بالطعنات حايرْ. ليل و ظنونـي سبايَـه ْ ايـتام و تلوع بـمَگابرْ.!!. صَفنة الفاگد صَفنتي تـملي لو سولِف دفاترْ. و صابـريت بصَبر خاسر ْ و انتَ تاجر ْ. وآنـه قُرضه الروح ماخِذها و اقـامـرْ. بَـلچي غلطه وياي ارد فرحان منك و ادري ارد فَشلان وِمحَمَّـل خسايـرْ. و ادري غِشٌمَة سوگ إحنه و هاي أَول شروه إلنه كلشي باول طَيحـته يـنسام غالـي وانت يالغالي صعب تنشال باير و راوَستْ روحي بـمَحَبتَـكْ و كلشي للشدّات ذاخرْ. و انتَ مو هلگد حَـلاتك ْ.! و الله بَـس جَـبرة خواطر ْ. يَـلْ هوَيتَكْ.. و انتَ ناسي.. و انتَ ناكر ْ. و انت ذيب.. وآدمي بلاية مشاعرْ. هَم ْ بعد بگليبي نَـبضه اتعثرت لحظة وداعك وانچفت بـيـدَكْ يـغادر. و آنه عاذر و آنه غافرْ.. و آنـه جَـنَّـه.. امشرعه لطَـبْـتَـك.. يكافر ْ. و آنـه جَـنَّـه و تـنـتـظر جَـيتَكْ يـبـاچر.ْ و السـنينْ تـفوت فَوتات الخناجرْ.. آ يباچر **** * لاتسافر.. أغنية لياس خضر. عبدالكريم صالح العامري واشنطن سياتل اميركاالمصدر